Pío Baroja en Lugo
No ano 1935 a
revista Estampa de Madrid encarga ao escritor Pío Baroja unha serie de artigos
sobre o percurso do carlista xeneral Gómez por diversas localidades do norte
peninsular. Imaxinamos que o encargo non desgustou a Baroja que sempre foi o
novelista das guerras carlistas por excelencia. Daquelas reportaxes conservamos
esta fotografía de Baroja en Lugo.
Dous meses antes o
filósofo lucense Celestino Fernández de la Vega publicaba nas páxinas de El
Progreso un artigo gabando o seu estilo atemporal. Celestino coñeceu a Baroja
en Madrid, nos parladoiros de “La Granja del Henar”, onde tamén acudían outros
intelectuais galegos como Gamallo Fierros.
Se cadra foi Cilistro quen o convidou
a vir por Lugo e pasear pola muralla. Se cadra o mesmo De la Vega fixo de cicerone
a un Baroja afogado en imaxes de guerra decimonónica e ao que Lugo se lle abría
como a derradeira reserva espiritual dun mundo esgotado. O novelista Juan Benet
dicía que un Baroja vello, arrastrando os pés ata enguruñarse nun sofá, sempre se laiaba da morte da novela:
<Despois de Stendhal nada>, seica dicía. Os vellos sempre teñen razón.
No hay comentarios:
Publicar un comentario